Xo’jayli ijtimoiy shaharchasi direktori Amangul Abdijamilova o’z xizmat mavqeidan foydalanib, bir necha yil davomida ijtimoiy shaharcha yashovchilari nomiga har biriga 100 million so’mgacha bo’lgan miqdorda kreditlar rasmiylashtirgan. Kredit olishdan bosh tortgan taqdirda ularni ijtimoiy shaharchadan chiqarib yuborish bilan tahdid qilgan.

Kreditlar rasmiylashtirilgandan so’ng, Abdijamilova ulardan bank kartalari va kredit shartnomalarini olib qo’ygan. Keyinchalik kredit tashkiloti ushbu kreditlar bo’yicha to’lovlarni har oy yashovchilarning nafaqalaridan ushlab kelgan.

Dastlabki hisob-kitoblarga ko’ra, ijtimoiy shaharchaning qariyb 30 nafar yashovchisi direktor Abdijamilovaning xatti-harakatlari natijasida yuzaga kelgan qarzdorlik qaramligida qolgan bo’lishi mumkin.

Bundan tashqari Abdijamilova bir necha yil davomida davlat tomonidan Xo’jayli ijtimoiy shaharchasining ehtiyojlari uchun ajratilgan mablag’larni talon-taroj qilib kelgan.

Shu bilan birga, Abdijamilova noqonuniy ravishda olingan mablag’lar hisobidan o’zining fermer xo’jaligini, kiyim-kechak do’konlari tarmog’ini tashkil etgan, shuningdek, Nukus shahrida tantanalar saroyi — to’yxona qurmoqda.

Amangul Abdijamilovaning xatti-harakatlaridagi qonunbuzarliklardan nafaqat mahalliy hokimiyat vakillari, balki respublika darajasidagi mansabdor shaxslar ham xabardor bo‘lgan. Biroq, Abdijamilovaning Qoraqalpog‘iston hokimiyat tuzilmalari vakillari orasidagi aloqalari unga javobgarlikdan qochish imkonini bergan.

Direktor Abdijamilova Meyrambek Yesemuratov va uning yaqinlaridan bir necha bor o’z nomlariga kredit rasmiylashtirishni talab qilgan. Biroq u bunga rozi bo’lmagan. Uni navbatdagi bor kredit rasmiylashtirishga majburlashga urinish vaqtida, ijtimoiy shaharchadan chiqarib yuborish bilan tahdid qilinganidan so’ng, Meyrambek Yesemuratov o’z joniga qasd qilgan.

Meyrambek 26 yoshda edi. Uning doimiy ishi bo’lmaganligi sababli Qozog’istonga ishlab pul topish uchun borib turgan. O’tgan yili u ro’yxatdan o’tmaganligi sababli Qozog’istondan deportatsiya qilingan va shundan so’ng u yerga ishlab borish imkoniyatidan mahrum bo’lgan.

Uning vafotidan so’ng xotini va ikki nafar yosh o’g’li qoldi.

Markaziy hokimiyat organlarining Qoraqalpog’istondagi Xo’jayli ijtimoiy shaharchasida sodir bo’layotgan qonunsizlikka e’tiborini jalb qilish maqsadida, Meyrambekning onasi Tazagul Yesemuratova video murojaat bilan chiqdi.